Farnes skule vart bygd i industrireisinga på 50-talet, første byggesteget i 1956. I takt med ei gigantisk utbygging av aluminiumsindustrien, auka elevtalet, slik at byggesteg 2 stod klart i 1961. Parallelt med dette vart Øvre Årdal ungdomsskule bygd i 1961 og til slutt 3. byggesteg på barneskulen i 1965.
Seinare er det gjort mindre og større ombyggingar, sist i 1991 då ungdomsskulen vart ombygd innanfor ei kostnadsramme på 15 millionar.
I 2003 vart det gjort ei omfattande renovering av småskulesteget (1. - 4. kl.) innafor ei kostnadsramme på 29. mill. kroner. Dette var fase 1 i ei renovering av heile barneskulebygningen. Oppstart av fase 2, renoveringa av mellomsteget og administrasjonsfløyen starta januar 2009, og var ferdig våren 2010.
Eldre skulehistorie
Den første skuleordninga for Årdal vart organsiert i 1741. Det skjedde på eit møte som sokneprest Jonas Leyerdal skipa til på Solvorn for "Lærdals Præstegjeld", som Årdal då høyrde under. Årdal vart då delt inn i to skulekrinsar - ein for bygder ved Årdalsfjorden og ein for øvre ovanfor Årdalsvatnet. Jens Bache vart første lærar, og hadde plikt til å gjennomføre 8 vekers skule i fjordbygdene og 16 veker i bygdene ovanfor vatnet.
Årdal vart skild frå Lærdal som eigen kommune i 1860, men først ved deling av prestegjeldet i 1863 vart Årdal sjølvstendig skulekommune. Kommunen hadde to lærarar på fastskule og to omgangsskulelærarar. I dei komande åra vart omgangsskulen gradvis avløyst av fastskule i bygdene. I tillegg til hovudbygdene Tangen og Farnes, vart det etter kvart eigne skulekrinsar i grendene Ofredal, Naddvik, Ve, Utladal, Vetti, Eldegard, Bergmål, Avdal, Seimsdal, Nundal og Fardal. Det første skulehuset vart bygd på Tangen i 1868. Farnes fekk skulehus i 1876, Vikadal 1878, Seimsdal 1883 og Ofredal 1903.
Etter mykje strid vart det ved dei største skulane innført prøve med dagleg skule i 1901. Dei eldste elevane gjekk på føremiddagen og dei minste på ettermiddagen, men etter sterke protestar frå foreldre vart ordninga etter kort tid avvikla. Nedlegging av grendaskulane starta på 1950-talet og var avslutta i 1972.