Om prosjektet nytt omsorgssenter

Helse- og omsorgsplan 2019 - 2029 vart vedteken i kommunestyret (PDF, 2 MB) 7. november 2019.

Planen vart arbeidd med over ein lengre periode med brei representasjon av brukarar, politikarar, tillitsvalde, tilsette og administrasjon. Det vart gjennomført idekafear, arbeid i ni tverrfaglege grupper med brukarrepresentasjon og politisk ad-hoc utval som styringsgruppe. Prosjektgruppa var samansett av gruppeleiarane i kommunestyret, administrativ leiing, brukarrepresentantar og tillitsvalde. Agenda Kaupang rapporten "Utvikling av omsorgstjenestene 2018" var eit viktig grunnlag for ny helse- og omsorgsplan.

Vedtak i kommunestyresak 117/19

1. Planen vert vedteken slik den ligg føre.
2. Det skal i 2020 startast planarbeid for ny sjukeheim lokalisert til Årdalstangen med ambisjon om samlokalisering av helse- og omsorgstenester.
3. Arbeide for "kjærleiksgaranti" - dvs. at eldre par som har behov for å bu i omsorgsbustad eller på sjukeheim, får bu saman der det er teknisk mogleg.
4. Oppdatering av kommunen sine heimesider skal ha høg prioritet frå hausten 2019.

I fyrste omgang vart det vurdert utviding og renovering av eksisterande sjukeheim på Årdalstangen og tomten der. Det vart vurdert å rive den eldste delen av Årdal sjukeheim og sette opp eit nytt bygg på denne tomten. Den nyaste delen skulle totalrenoverast.

Kvaliteten på bygningsmassen er av ein sånn tilstand (storleik på rom, snu-sirklar, bad osv.) at det ikkje har det nivået for tilsette og bebuarar som vert kravd for å kunne gje eit framtidig godt omsorgstilbod.  Teknisk tilstandsrapport har avdekka at heile bygget har ein bygningsteknisk tilstand som tilseier at det vil vere både fagleg og økonomisk uforsvarleg å gjere noko med dagens sjukeheim. Grunnforhold på tomt er og ein variabel som må takast omsyn til. I tillegg vil eit nybygg krevje større areal enn det som er mogleg å få til på tomta i dag. 

I samråd med formannskap og utvala har oppdraget til kommunedirektøren endra seg frå å renovere og bygge ut eksisterande sjukeheimstilbod til å planlegge for nytt omsorgssenter med fleire tenester. Det er ikkje avklart etterbruk av dagens sjukeheim eller andre bygg, men dette bør vurderast i eit eige prosjekt. 

Det er politisk vedtak på at det skal planleggast for ein ny sjukeheim lokalisert på Årdalstangen med ambisjon om samlokalisering av alle helse- og omsorgstenester. Kommunedirektøren har difor ikkje vurdert andre plasseringar i kommunen. I høve til Leve heile livet reforma er ikkje Seimsdalen vurdert som eit alternativ. 

Dette er kartlagt:

• Avklart teknisk tilstandsrapport for Årdal sjukeheim
• Kartlagt grunnforhold for å avklare moglegheit for utbygging på eksisterande tomt
• Utarbeidd romprogram for å avklare behovet for areal for å kunne få samlokalisert helse- og omsorgstenester
• Kartlagt aktuelle tomteareal på Årdalstangen som kan stette arealkravet i romprogrammet
• Dialog med aktuelle eigarar av eigedom/tomt.
• Taksert aktuelt utbyggingsområde

Tenestene i helse og omsorg er i dag spreidd i heile kommunen. Det er to sjukeheimar på Årdalstangen – Årdalstangen sjukeheim med 34 plassar samt produksjonskjøken og Seimsdal sjukeheim med 16 plassar.

I tillegg har ein Årdal Bu- og omsorgssenter (ÅBO) i Øvre Årdal der ein finn 23 samlokaliserte omsorgsbustadar og korttidsavdeling med 9 plassar. Det er 20 omsorgsbustader i Øvstetunshagen og 10 trygdebustadar i Uravegen.

Heimesjukepleie er delt i to soner; ei i Øvre Årdal og ei på Årdalstangen - lokalisert høvesvis på sjukeheimen på Årdalstangen og på ÅBO i Øvre.
Heimehjelpstenesta og Fysio/ergo er lokalisert til ÅBO i Øvre Årdal. Barnefysio er plassert på Gamleskulen i Øvre Årdal. Legekontoret og helsestasjon er plassert på helsehuset i Øvre Årdal, og legevakt og KAD senger er plassert i Lærdal ved Lærdal medisinske senter.  

Kommunestyret 3. november KST - 051/22 vedtak:

1. Kommunedirektøren får mandat til å gå vidare med alternativ 2 Jernbanestasjonen for bygging av eit nytt omsorgssenter. Dette gjeld område som kommunen eig og disponerer i dag. (PDF, 897 kB)
2. Administrasjonen skal legge fram eit forprosjekt innan 30. mars 2023. 
3. Forprosjektet skal leggje til grunn vedteken Helse- og omsorgsplan 2019-2029 der vedtak var: «Det skal i 2020 startast planarbeid for ny sjukeheim lokalisert til Årdalstangen med ambisjon om  samlokalisering av helse- og omsorgstenester».
4. Det skal utarbeidast eit romprogram i tråd med Helse- og omsorgsplanen og behov i Omsorgstrappa. Dagsenter og produksjonskjøken skal inn i romprogrammet.
5. Forprosjektet skal vurdere behovet for tal langtidsplassar, korttidsplassar, rehabiliteringsplassar, avlastningsplassar og omsorgsbustader. 
6. Forprosjektet skal vurdere om plassane i Seimsdalen sjukeheim og ergo/fysioterapi skal overførast til nytt omsorgssenter av økonomiske og faglege årsaker.
7. Forprosjektet må vurdere økonomiske konsekvensar både på drift og investering 
8. Det etablerte ad-hoc utvalet skal delta i arbeidet saman med administrasjonen for å førebu forprosjektet.

Vurdering av areal

Behovet for areal er avhengig av innhald i bygget. Det vart derfor kartlagt alle tenester som ein ser føre seg kan vere aktuelle inn i bygget og kva behov kommunen kan ha i framtida. Arbeidet har teke utgangspunkt i det som kom fram i dialogkafear m.m. i samband med arbeidet med helse og omsorgsplanen i 2019. Det vart utarbeidd eit forslag til romprogram som konkluderte med eit behov for ei grunnflate på 12.000 m2 eller 12 mål. Da var det og teke med uteområde for parkering og sansehage. Dette baserer seg på at alt må byggast nytt og at det ikkje er eksisterande bygg/bustadar som kan sambrukast/nyttast på ny. Behovet for 12.000 m2 gir ein indikasjon på dagens behov – men er og ein illustrasjon på at området må møte framtidige behov. Behovet for til dømes omsorgsbustader kan auke om nokon år og da må det vere areal tilgjengeleg for å kunne bygge ut i fleire byggetrinn. 

Vedtaket frå 2019 slo fast at det er på Årdalstangen ny sjukeheim/samlokaliserte tenester skal ligge. Norconsult vart engasjert til å vurdere kva områder på Årdalstangen som kunne vere aktuelle. Storleik, krav til rassikring, nærleik til sentrum er variablar som må takast omsyn til. 
Det vart synleggjort fleire områder på Årdalstangen som kunne vere aktuelle for vidare vurdering av areal.

Etter arbeidsmøter i utval for teknisk og utval for helse, omsorg og NAV, var konklusjonen at det var to område som peika seg ut; Saltviki og "Jernbanestasjonen". 

Saltviki

Årdal kommune er grunneigar for deler av tomteområdet, men har festa dette vekk. Administrasjonen har hatt fleire møter med eigar/festar av arealet i Saltviki. Det var knytt usikkerheit til at ein ikkje veit om kommunen får kjøpt området, når det kan kjøpast, til kva pris eller om det er mogleg å bygge der. Dersom ein valgte dette alternativet måtte ein rekne med at prosessen med eit nytt omsorgssenter vert forseinka med minst eitt år. Produksjonslokalet på tomta er per no ikkje til sals og det vart derfor ikkje aktuelt å vurdere dette området vidare.
Området er i faresone for ras og dersom det skal etablerast ny aktivitet i området vil det bli krav om rassikring. Kostnader til rassikring er ikkje avklart.

"Jernbanestasjonen"

«Jernbanestasjon» er området aust for rådhuset og festplassen. Heile området inkluderer festplassen og friluftsbadet med pumpebygg. Tangevegen 14 er nyleg renovert og kommunedirektøren meiner ein må freiste å inkludere dette bygget som ein del av eit nytt senter.
Sentrum av Årdalstangen har behov for eit løft – og eit omsorgssenter kan vere med på å heve den visuelle kvaliteten. Ved etablering av eit omsorgssenter i dette området vil kommunen kunne få eit moderne omsorgssenter med samlokaliserte tenester – som og kan bidra til ei betydeleg visuell oppgradering av sentrum på Årdalstangen.

Alternativa vart lagt fram for kommunestyret i møte 3. november 2022 og med vedtak i Ksak 051/22.

Årdal kommune har ute anbod på skisseprosjekt for bygging av nytt omsorgssenter på Årdalstangen.

Det er invitert til konkurranse om prosjektering av skisseprosjektet, med opsjon på forprosjekt. Konkurransen vert gjennomført som ein avgrensa konkurranse med forhandling. Minimum tre prekvalifiserte tilbydarar vert invitert til å gje tilbod og konkurrere om tildeling av kontrakt basert på konkurransegrunnlaget. Konkurransen er kunngjort på Doffin og TED-databasen, og følgjer forskrift om offentlege innkjøp.

Tilbodsfristen er onsdag 12.04.2023 kl. 12.00.

*Tidspunkt er førebels og kan endra seg i forhold til levering frå tilbydar

Formannskapet vedtok i møte 23. mars prosjektmandat for skisseprosjektet.

*Tidspunkt er førebels og kan endra seg i forhold til levering frå tilbydar

Det har vore lyst ut anbodskonkurranse på Doffin der kommunen har bedt om tilbod på geotekniske og miljøtekniske grunnundersøkingar. Det kom inn tre tilbod.

Norconsult har fått tildelt oppdraget med grunnundersøking som omfattar:

• Forberedende arbeid
• Geotekniske grunnundersøkinger
• Miljøtekniske grunnundersøkinger
• Analyser av prøver i laboratorium
• Geoteknisk datarapport
• Innledende geoteknisk prosjektering og vurdering ih.t teknisk beskrivelse og mengdeliste
• Miljøteknisk rapport

Grunnundersøkinga vil mest truleg skje i mai månad.

Årdal kommune har i vår hatt ute anbod for prosjektering av skisseprosjekt, med opsjon på forprosjekt for bygging av nytt omsorgssenter på Årdalstangen.

20 tilbydarar leverte inn anbod til prekvalifisering og fem av desse vart teken med i vidare forhandlingar.

Etter forhandlingane er det no klart at kommunen vil gå vidare med og inngå avtale med Norconsult AS.

Arbeidet med skisseprosjektet vil ta til i midten av august. Det var i utgangspunktet planlagt oppstart arbeide før ferien men etter at kommunen måtte legge ut anbodet på Doffin vart arbeidet utsett til over ferien.

Pål Bjørkhaug, avdelingsleiar for Arkitektur & Landskap hjå Norconsult, seier i ein uttale "at Norconsult-kontora i Årdal, Sogndal og Bergen er særs glade for å ha vorten valt som rådgjevar i samband med utviklinga av det nye omsorgssenteret på Årdalstangen. Vi ser fram til eit godt samarbeid - og saman med Årdal kommune skal vi i lag utvikle eit godt og framtidsretta prosjekt for heile Årdalssamfunnet."

Årdal kommune er glad for å få ein særs røynd samarbeidspart med seg i arbeidet med det nye omsorgssenteret. Framover vil det vere viktig å sikre ei god framdrift samt ei brei involvering av tilsette og brukarar.  

Det vart gjort slikt vedtak i Kommunestyret 23.10.2023 (PDF, 64 kB) - endring av mandat for skisseprosjekt.

Norconsult har levert rapport på skisseprosjekt for nytt omsorgssenter og denne vil bli presentert på informasjonsmøte 12. februar.
 

Rapport på skisseprosjektet for nye omsorgssenteret. (PDF, 6 MB)

 

Måndag 12. februar vart det gjennomført to informasjonsmøter om skisseprosjekt for nytt omsorgssenter.  

Fekk du ikkje med deg nokon av desse møta så har du no høve til å sjå opptak frå møtet i Øvre Årdal og du kan bla igjennom presentasjonen til Norconsult.

Informasjonsmøte i Øvre Årdal 12. februar (sendinga startar cirka 09.43 ut i opptaket)

Norconsult sin presentasjon på møtet (PDF, 5 MB)

Kommunestyret har handsama sak i møte 21. mars og gjort følgjande vedtak:

Kommunestyret vedtok i møte 20. juni å starte opp forprosjekt for nytt omsorgssenter.

Vedtak Ksak 043/24:

1. Forprosjektering av nytt omsorgssenter på Årdalstangen vert starta opp. 
2. På bakgrunn av dei forhandlingar som er gjort med Norconsult vert investeringsramma auka til forprosjekt til 22,5 mill. + mva. fordelt på 2024/2025
3. I den kommande reguleringa skal ein sjå på den heilskaplege parkeringssituasjonen i høve Årdalstangen sentrum.
4. Prosjektet må ha hovudfokus på reduserte kostnader. Førebels berekning av behovet for å auke investeringsramma i økonomi- og handlingsplan er sett til kr. 133.179.930. Kommunestyret ber om ein analyse av kor mykje prosjektkostnaden kan nærme seg det budsjetterte låneopptaket i økonomiplanen (kr. 250.400.000) og samstundes la seg realisere. Rapport til formannskapet som ein del av arbeidet med budsjett- og økonomiplan 2025.
5. Prosjektet skal realiserast med minst mogleg tilleggsareal til bassengtomta. Kommunestyret ber om ein analyse av konsekvensane for prosjektet ved ein størst mogleg reduksjon av tilleggsareal.
6. Kommunestyret ber om ein plan for kva ein skal gjere med eksisterande bygningsmasse som blir ståande tomme. Planen skal innehalda berekning av kostnader med ulike alternativ inklusiv sanering. Rapport til formannskapet som ein del av arbeidet med budsjett- og økonomiplan 2025
7. Fleire bygningar og anlegg eigd av Årdal kommune har eit omfattande etterslep av vedlikehaldsbehov. For å få fram kommunen sitt samla vedlikehaldsbehov/investeringar, ber kommunestyret om oversyn over dei mest aktuelle bygningane og anlegg med stipulerte kostnader. Sak til formannskapet som ein del av arbeidet med budsjett- og økonomiplan 2025.
8. Styringsgruppa skal vere løpande orientert.

20. juni 2024 gjorde kommunestyret vedtak om at framlegg til skisseprosjekt vert vidareført til eit forprosjekt med alternativ 2, omsorgssenter med 72 bueiningar, produksjonskjøken, ergo/fysioterapi og dagsenter – og at forprosjektet skal realiserast med minst mogeleg tilleggsareal til bassengtomta. 

Det er inngått kontrakt med Norconsult for gjennomføring av forprosjektet. Kontrakten har ein verdi på ca. 11 mill., i tillegg ligg det inne opsjonar til ein verdi på 2,8 mill. 

Kommunen og Norconsult gjennomførte oppstartsmøte for forprosjektet 26. august. Forprosjektet vil vara til sommaren 2025. Parallelt med forprosjektet vil kommunen utføra grunn- og miljøundersøkingar på bassengtomta og miljøkartlegging av bygningskonstruksjonar som eventuelt skal rivast.

Reguleringsplanarbeidet vert gjennomført parallelt med forprosjektet.

Det er varsla oppstart av reguleringsplanarbeidet den 17.10.24. Varselet er sendt til grunneigarar, naboar og relevante myndigheiter. I tillegg er det lagt ut på heimesida til kommunen og publisert i Sogn Avis.

Frist for innspel er sett til 18.11.24

Detaljreguleringsplan for omsorgssenter på Årdalstangen

Norconsult sitt prosjekteringsarbeid går stort sett som planlagt fram mot det som skal leverast ved første milepæl 6. desember. Reguleringsplanarbeidet går som planlagt fram mot høyringsfristen 18. november.

I perioden har representantar for brukarane og Norconsult vore på synfaring på Vaksdal og Åsaheimen omsorgssenter med etterfølgjande brukarmøte nr. 2.

Hovudaktivitetar i perioden:

• Regelmessige prosjekteringsmøter mellom oppdragsgivar og Norconsult
• Optimalisering av planløysingar og romprogram som resultat frå nemnte synfaringar og brukarmøter.
• Foreløpig romprogram syner ein reduksjon på 2.300 m2 BTA samanlikna med skisseprosjektet. Dette kan bli ytterlegare redusert dersom heimetenesta vert verande i ØÅ.
• Ein reduksjon av romprogrammet kan gjere det enklare å finne ei god løysing med minst mogeleg tilleggsareal.• Det er gjennomført innmåling av teknisk infrastruktur og scanning av bassengtomta.

I samsvar med vedtak i prosjektet nytt omsorgssenter skal det gjennomførast miljøtekniske grunnundersøkingar og miljøkartlegging på området og i bygg som kan vere relevant i forhold til bygging av nytt omsorgssenter på Årdalstangen. 

Miljøtekniske grunnundersøkingar inneberer boring som kan føre til noko støy og etterlate merke i terrenget. Tiltaket vil bli gjennomført så skånsomt som mogleg, mellom anne ved å bruke matter som vernar mot hjulspor. Arbeidsområdet rundt boreriggen vil bli avgrensa med sperreband for å sikre ei trygg og effektiv gjennomføring av grunnundersøkinga. Etter fullført arbeid vil området bli grundig rydda, borehola vert fylt igjen og eventuelle hol i asfalten vert utbetra og reasfalterte.

Miljøkartlegginga og dei miljøtekniske grunnundersøkingane vert utført av Norconsult Norge AS på vegne av Årdal kommune. Arbeidet er planlagt til veke 49, med oppstart måndag 02.12.2024 kl. 09:00 og avslutning torsdag 05.12.2024 kring kl. 12:00.

 Ta kontakt med Frank Runar Øren om det er spørsmål om miljøtekniske grunnundersøkingar.

Ta kontakt med Stine Ohrvik om det er spørsmål angåande miljøkartlegging i bygg.

Prosjektet informerer styringsgruppa (formannskapet) fortløpande om status i prosjektet. Samandrag av siste løypemelding til styringsgruppa i det etterfylgjande.

Som informert om i desember, er det no gjennomført miljøtekniske grunnundersøkingar og miljøkartlegging på området og i bygg som kan vere relevant i forhold til bygging av nytt omsorgssenter.

Resultata frå dette arbeidet som no ligg føre, vert tekne med i vidare prosjektering.

Forprosjektet for nytt omsorgssenter starta opp i august 2024 og skal vera ferdig sommaren 2025. I første fase av forprosjektet er det testa ut to konsept og utforming for nytt omsorgssenter:

• Konsept 1 – ‘Tangenten’: Ei vidareutvikling av konsept (Alt. 2) frå skisseprosjektet som vil krevje at Tangevegen 16, 18 og 20 inngår i tomtearealet som tilleggsareal til ‘bassengtomta’.
• Konsept 2 – ‘Stjerna’: Eit nytt konsept der talet på bueiningar er redusert frå 72 til 69. Konseptet vil krevje at Tangevegen 16 og 18 inngår som tilleggsareal til ‘bassengtomta’.

Konsept 1 ‘Tangenten’ – Tre tilleggstomter

Konsept 2 ‘Stjerna’ – To tilleggstomter

Ingen ting er bestemt enno, men utgangspunkt for vidare prosjektering ligg i Konsept 2.

Planprosessen med å få på plass ein ny reguleringsplan pågår parallelt med prosjekteringa. I perioden er det gjennomført dialogmøte med både Statsforvaltaren i Vestland og Vestland fylkeskommune.  Det er gjennomført medverknad retta mot barn og unge sine interesser med tanke på uteområder kring omsorgssenteret.

Det pågår og ein prosess med grunneigarar som kan bli råka av ei evt. utbygging med tanke på mogeleg oppkjøp av eigedommar.

Månadsrapport sendt til styringsgruppa (PDF, 983 kB)

Månadsrapport mars 2025 (PDF, 982 kB)

Månadsrapport april 2025 (PDF, 987 kB)

Planframlegg for Detaljreguleringsplan Årdal omsorgssenter er lagt ut til offentleg ettersyn. Alle som ynskjer kan kome med merknader innan 18. juli 2025. Etter at fristen er utløpt, vil kommunen gå gjennom merknadene og handsame planen for endeleg vedtak i kommunestyret.

Informasjon om høyringa og høyringsdokument med vedlegg.

Torsdag 19. juni skal styringsgruppa gjennomføre usikkerheitsanalyse for prosjekt nytt omsorgssenter.  Resultat av analysen vert lagt fram som prosjektrapport til styringsgruppa 21. august.

Prosjektgruppa for nytt omsorgssenter har i dag lagt fram forprosjektrapporten til styringsgruppa. Forprosjektet er vidareutvikla frå skisseprosjektet som vart overlevert i januar 2024.

Forprosjektrapporten inkluderer vurdering av alternative løysingar innanfor materialar, klimagassberekninger, ein miljøoppfølgingsplan, samt at ein har gjennomført analyser knytt til optimalisering av energieffektive løysingar for bygget. Det vil også fokusere på å integrere teknologi for å sikre at omsorgssenteret er tilpassa framtidas behov.

Rapporten er no lagt fram og den vil bli gått grundig igjennom internt.

Kommunedirektøren skal så utgreie vidare framdrift og legge fram sak med tilråding til politisk handsaming i løpet av september.

Forprosjektrapport nytt omsorgssenter (PDF, 8 MB)

I møte 25. september i Ksak 058/25 Forprosjektrapport nytt omsorgssenter vart det gjort følgjande vedtak:

1. Med bakgrunn i kommunen sin økonomiske situasjon og utsiktene i Økonomiplan 2026-2029, er det ikkje rom for å gå vidare med prosjekt nytt omsorgssenter slik forprosjektrapporten skisserer.
2. I perioden fram til nytt budsjett 2027 skal administrasjonen utgreie alternative måtar å stette behovet for omlegging og auke i kapasitet i eldreomsorg. Ein vil då få eit betre grunnlag for å vurdere fleire konsept opp mot kvarandre.  
   I vidare utgreiing skal det leggast vekt på om omlegging kan skje ved å nytte dei bygningane kommunen allereie har i dag.
3. Styringsgruppa, dei politiske utvala og tillitsvalde skal vere tett på prosessen i det vidare arbeidet jf. punkt 2. Kommunedirektøren skal rapportere fortløpande til kommunestyret, minimum kvartalsvis.
4. Årdal kommune må avklare kva kommunale bygg ein skal nytte seg av i framtida. Denne avklaringa ynskjer me å få som ei prioritert liste i samband med budsjettprosessen 2027.
5. Ny skule- og barnehagestruktur skal utgreiast i same tidsperiode.
6. Årdal kommune skal utarbeide ein 10-årsplan for større investeringar i samband med budsjettprosessen 2027.

Kommunedirektøren vil no sette i gang arbeidet med å avslutte det pågåande prosjektet og lage ein framdriftsplan for dei punkta som kommunestyret har vedteke skal skje.

Styringsgruppa for omsorgssenter var samla torsdag 23. oktober og fekk lagt fram sluttrapporten for forprosjektet. 

Det vart vedteke ei budsjettramme på 22,5 mill. for forprosjektet. Budsjettramma skulle inkludera prosjektering inkl. geo- og miljøtekniske grunnundersøkingar og miljøkartlegging av bygningsmasse, administrasjon og evt. uforutsette kostnader. 

Sluttrapport forprosjekt nytt omsorgssenter. (PDF, 2 MB)

Rekneskapen for avslutta forprosjekt syner ein sluttkostnad på 13,9 mill.