Indre Sogn vassområde er blant dei ti største vassområda i Noreg med sine 8818 km2. Per 20.12.2021 er vatnet i vassområdet delt opp i til saman 750 vassførekomstar.
Vassområdet femnar om heile den indre delen av Sognefjordsystemet med kommunane Aurland, Leikanger og Sogndal ytst og Luster, Lærdal og Årdal inst. Mindre areal i kommunane i dei tilgrensande vassområda Sunnfjord, Ytre Sogn, Valdres, Voss-Osterfjorden, Hardanger, Hallingdal, Nordfjord og Mjøsa inngår også i vassområdet.
Vassområdet er prega av store høgdeforskjellar med bratte vassdrag og lange fjordarmar. I vassområdet greiner Sognefjorden seg ut i fjordarmane Fjærlandsfjorden, Sogndalsfjorden, Lustrafjorden, Årdalsfjorden, Nærøyfjorden og Aurlandsfjorden.
Mange av vassdraga, spesielt på nordsida av Sognefjorden, er brepåverka med avrenning frå Jostedalsbreen.
Heile fjordsystemet i vassområdet ligg innanfor grensa til den nasjonal laksefjorden Sognefjorden. Nasjonale laksevassdrag er Flåmselvi, Årøydalselvi, Lærdalselvi og Nærøydalselvi.
Mange av vassdraga og vassførekomstane er nytta til vasskraftproduksjon.
Vasskraft og fysiske endringar i vassførekomstar, særleg forbyggingar og kanalisering, utgjer dei to største påverknadane for vassmiljøet i Indre Sogn vassområde. Andre store påverknadar i vassområdet er jordbruk, avløp og akvakultur.
Lær om arbeidet me gjere med vassområda på vannportalen