Kartleggingane vart gjennomførte etter NiN-metoden (Natur i Noreg) i mellom anna Utladalen, Loi, Naddvik, Årdalstangen, Fardalen, Seimsdalen og Offerdalen. Arbeidet vart utført av Dokkadeltaet Våtmarkssenter og Miljøfaglig Utredning på oppdrag frå kommunen.
Kartleggingane viser at Årdal har eit naturmangfald av nasjonal verdi. Langs Utla og Nysetelvi i Naddvik dominerer flomskogsmark, ein sårbar naturtype som er sjeldan i nasjonal samanheng. I dei nedre dalføra og lisidene finn vi rik edellauvskog med alm, lind og hassel, og gamal høgstaudeskog med høg biologisk variasjon. Mest trua er likevel slåttemark og lauveng, kulturlandskap som er skapt gjennom hundreår med tradisjonell drift, og som husar eit særeige mangfald av artar.
Mange av desse lokalitetane er i dag prega av gjengroing fordi den gamle drifta har teke slutt. Det understrekar kor viktig aktiv skjøtsel er for å ta vare på naturverdiane framover.
Kunnskapen frå 2025 gjev kommunen eit godt grunnlag for å forvalte naturen klokt, og for å ta vare på dei naturverdiane som gjer Årdal til ein nasjonalparkkommune.
Naturtypekartlegging i Årdal 2025 (PDF, 3 MB)
Naturmangfoldkartlegging i Årdal 2025.pdf (PDF, 8 MB)