VEDTEKTER FOR ÅRDAL KOMMUNALE SFO
Gjeldande frå 01.01.2010
1. FØREMÅL, DRIFT OG FORVALTNING
A. Årdal kommune si skulefritidsordning skal drivast i samsvar med kommunale planar og vedtak, og etter retningslinjer gjevne av kyrkje-, utdannings og forskingsdepartementet.
B. Årdal kommune har ansvaret for drift og vedlikehald.
C. Ordninga er administrativt knytt til grunnskulen.
D. Grunnskulen sitt foreldreråd og samarbeidsutval er styringsorgan for skulefritidsordninga.
E. Rektor har det administrative og pedagogiske ansvaret for skulefritidsordninga.
F. Leiaren har ansvaret for den daglege drifta.
2. SKULEFRITIDSTILBODA
Barn i 1. – 4. klasse får tilbod om plass ved skulefritidsordninga.
Barn i 5. – 7. klasse med særskilde behov kan etter søknad få tilbod om plass ved skulefritidsordninga.
Tilboda vert gjevne etter tre alternativ:
1. FØR undervisningstid
2. ETTER undervisningstid
3. FØR OG ETTER undervisningstid
3. OPPHALDS OG OPNINGSTIDER
A. Skulefritidsordninga (SFO) har ope mellom kl. 06.45 – 16.00 kvar dag.
B. På årsbasis følgjer opningstida skuleruta for grunnskulen.
C. Julaften, nyttårsaften og onsdag før skjærtorsdag stenger SFO kl. 12.00.
D. Opphald i skulefrie periodar/ feriar kan organiserast etter behov mot betaling, men må ikkje gå utover barna sin rett til 5 veker ferie i skuleåret. 3 veker skal avviklast mellom skuleslutt og skulestart på sommaren.
Er det mindre enn 5 påmeldte barn til skuleferiane, stengjer SFO. Dette gjeld heile skuleåret.
Barn med særskilde behov, sett vekk frå regelen om stenging ovanfor, kan få plass etter avtale.
E. SFO har felles stengt veke 29 og 30 om sommaren. Desse vekene blir rekna som ein del av barna sin obligatoriske ferie.
F. I tråd med sentrale avtaler er SFO stengt i 5 dagar kvart skuleår. Desse dagane nyttar personalet til planlegging og kompetanseheving. Dagane vert rekna som ein del av barna sin obligatoriske ferie.
G. Planleggingsdagane i SFO er lagt til skulefrie dagar.
4. OPPTAK AV BARN
A. Frist for hovudopptak av barn er sett til 1. februar og vert kunngjort i lokalpressa. Det skal søkjast på fastsette skjema med stadfesting av føresette sine inntekter medrekna trygd. Føresette har plikt til å melde frå til styraren om endringar i økonomiske tilhøve.
B. Det kan søkjast om opptak gjennom heile året og det blir sett opp ei uprioritert venteliste. Alle søknadane vert vurderte når ein får ledig plass.
C. Leiaren ved kvar SFO og rektor har ansvaret for opptaket. Det skal reserverast ein plass på kvar avdeling til etter handsaming av klager.
D. Kvar søkjar skal vurderast særskilt.
Opptakskriterier:
- Barn med nedsett funksjonsevne eller barn med vedtak frå barnevernet.
- Barn til einsleg forsytar som er yrkesaktiv eller skuleelev.
- Sambuar vert vurdert likt som ektefeller om dei har budd saman i meir enn eitt år.
- Barn av foreldre der begge er yrkesaktive utover eleven si skuletid.
- Barn av foreldre som har ein ”nøkkelkompetanse” som Årdal kommune treng.
Vert drøfta med rådmannen i kvart einskild tilfelle.
- Barn i 1. klasse har førerett framfor eldre elevar.
- Barn tilvist av fagleg instans, PPT, sosialkontor eller lege.
5. KLAGERETT
A. Tildeling av plass/avslag på søknad om plass er å rekna som eit einskildvedtak, og Forvaltningslova sine reglar gjeld.
B. Formannskapet er klageinnstans. Klage vert å senda tenesteområdet seinast tre veker etter at melding om vedtak er motteke.
6. TAP AV RETTER/OPPSEIING
A. Skulefritidsordninga skal seiast opp skriftleg med ein månads varsel.
B. Oppseiing av plassen må skje einan den 1. eller 16. i månaden. Då har ein plass i SFO til den 1. eller 16. i månaden etterpå.
C. Etter vedtak av rektor kan barn miste plass dersom:
1. Den føresette ikkje betalar i rett tid
2. Plassen vert nytta utover avtala tid
7. BETALING
Formannskapet vedtek betalingsordningar etter fullmakt frå kommunestyret.
- VEDLEGG TIL VEDTEKTER FOR ÅRDAL KOMMUNALE SFO
1) Det vert betalt for opphald i 10 månader. Betalingsfrie månader er halve juni, heile juli og halve august.
2) I samband med at barn tek til i SFO i løpet av skuleåret gjeld følgjande reglar:
Byrjar 01. – 15. 1/1 månadsbetaling
Byrjar 16. – 31. ½ månadsbetaling
3) Foreldrebetalinga gjeld frå den datoen barnet får tildelt plass.
4) Betalingssatsen vert fastsett på bakgrunn av brutto inntekt.
5) Brutto inntekt er familien si samla inntekt (ektefelle/sambuar, og sambuar som ikkje er biologisk far/mor til barnet). Med sambuar meiner ein ekteskapsliknande forhold med felles hushald og at partane har levd slik i minst 12 av dei siste 18 månadane. Føresette må gje opplysningar om inntektsforhold på eige skjema som må underskrivast av arbeisgjevar/ trygdekontor o.a. Familiar som ikkje dokumenterer inntekt, vert fakturert med høgaste sats. Endringar i inntektsgrunnlag må leggast fram straks endringa er kjent. Rekninga vert korrigert ved første fakturering etter at dokumentasjon føreligg.
SØSKENMODERASJON I BARNEHAGAR/ SKULEFRITIDSORDNING:
Utganspunktet skal vera at det skal betalast fullt for den plassen som er dyrast. Kommunestyret har fastsett slik søskenmoderasjon, K-sak 74/04:
Barn nr. 2 som går i barnehage/ SFO, får 30 % reduksjon i foreldrebetalinga, andre barn i barnehage/ SFO får 50 % reduksjon.
Det blir ikkje gitt søskenmoderasjon på ferietilbodet til SFO.
Innbetalinga skjer til økonomiseksjonen den 15. i kvar månad. Dei som har gjeve Årdal kommune fullmakt for bruk av AVTALEGIRO, vert automatisk trekt for barnehage/ SFO avgift kvar månad. Er barnet sjukt og utgjer fråværet ein samanhengande periode på meir enn ein månad, og det ligg føre legeerklæring om barnet sin sjukdom/ fråvær, vert det godkjent fritak frå betaling etter søknad.
