Vaksenopplæring

Vaksenopplæringa i Årdal har tilbod til to elevgrupper:

1. Vaksne menneske som har rett til spesialundervisning på grunnskulenivå fordi dei ikkje kan få tilfredstillande utbytte av det ordinære oplæringstilbodet for vaksne. Denne gruppa får opplæring for å kunne utvikla og halda ved like grunnleggjande dugleik.
2. Norsk med samfunnsfag for minoritetsspråklege. Innvandrarar som har fått opphaldsløyve etter 01.09.05 har rett og plikt til opplæring i minimum 300 timar. Av desse timane skal 50 timar vera samfunnsfag på eit språk dei forstår. Nye innvandrarar må søka om timar hjå vaksenopplæringa og får søknadskjema der. Dei skal også førast inn i eit sentralt innvandrarregister NIR der alle gjennomførte timar skal registrerast kvar skuleveke. Alle må gjennomføre minst 300 timar og av desse må alle 50t samfunnsfag vera fullført for å få godkjent busettingsløyve etter 3 år og evnt. statsborgarskap etter 7 års samanhengande butid i landet. Undervisninga følgjer læreplan der elevane kan følgja tre spor med ulik vanskegrad.

Flyktningar og asylsøkarar som er mottekne av Årdal kommune og familieforeinte med desse, kan få introdusksjonsopplegg med løn for å delta i kvalifiseringskurs i kommunen viss hovudpersonen har budd mindre enn 5 år i kommunen. Kommunen kan velja å gjera unnatak frå regelen.

Personar som fekk opphald før 01.09.05. med rett til gratis norskopplæring har frist til 01.09 2010 til å nytte timane dei fekk tildelt i ei overgangsordning i dette tidsrommet.

Desse gruppene har rett og plikt til min. 300 timar:

• Flyktningar og personar som er verna mot forfølgjing etter utlendingslova § 15 og deira familieforeinte
• Personar med opphald på humanitært grunnlag og deira familieforeinte
• Familieforeinte til norske og nordiske borgarar
• Personar med opphaldsløyve som bur i eit asylmottak medan dei ventar på å bli busett i ein kommune
• Asylsøkjarar i alderen 16 - 18 år uavhengig av når dei kom til landet
• Personar med kollektivt vern

Det er berre personar i alderen 16 - 55 år som har rett og plikt. Personar mellom 55 og 67 år har rett, men ingen plikt til norskopplæring.

Følgjande grupper har verken rett eller plikt til opplæring i norsk og samfunnskunnskap:

• Studentar
• Au pairer og andre med mellombels opphald
• Nordiske borgarar
• Personar med opphald etter EFTA/EØS-regelverket

Følgjande grupper har ikkje rett til gratis opplæring, men har plikt til å gjennomføre 300 timar opplæring i norsk og samfunnskunnskap betalt av dei sjølve eller arbeidsgjevar dersom dei skal få busettingløyve etter 3 år:

• Arbeidsinnvandrarar utanfor EØS/EFTa-området
• Personar som kjem til landet på grunnlag av familieforeining med desse